Deputeti i Lidhjes Demokratike të Kosovës, Ismet Beqiri përmes një shkrimi në Facebook ka komentuar marrëveshjen për konsensus sa i takon ratifikimit të demarkacionit me Malin e Zi, mes partive politike.

Beqiri ka lavdëruar partinë e tij duke thënë se pavarësisht se gjenden në opozitë dhanë kontributin për të mirën e qytetarëve.

“Qytetarët e Kosovës meritojnë të lëvizin lirshëm,meritojnë dhe e kemi obligim dhe për nder të jemi në shërbim të tyre. Lidhja Demokratike e Kosovës edhe këto ditë tregoi se është parti që punon për të mirën e vendit. Pavarësisht se jemi për momentin në opozitë, ne dham dhe do të japim kontributin tonë për të mirën e qytetarëve tonë”, ka shkruar Beqiri.

Ka thënë se pas gjetjes së rrugëdaljes për ratifikimin e demarkacionit shpreson që kjo çështje të përfundoj. Po ashtu ka thënë se nuk ka qenë e lehtë të diskutohet për këtë çështje.

“Gatishmëria jonë, qëndrimi ynë për gjetjen e rrugëdaljes për Ratifikimin e Marrëveshjes së Demarkacionit, shpresojmë të përfundoj me kryerjen e këtij obligimi. Nuk ishte e lehtë të dialogohet këto ditë për tu mirëkuptuar oferta jonë si rrugëzgjidhje, mirë që kjo u bë. Padrejtësisht kjo u vonua mbi dy vite,me çka u dënuan qytetarët tonë. LDK ishte dhe mbetet garancë e Republikës së Kosovës”, ka shkruar Beqiri.

Më shumë artikuj të ngjashëm
Më shumë nga Wikiliks
Shfaq më shumë në Lajme