Pas iPhone 11, Apple prezanton edhe iPhone 11 Pro dhe Pro Max – me tri kamera

Gjiganti teknologjik amerikan, Apple, ka prezantuar të martën në Kaliforni modelet e tij më të reja dhe më të avancuara të telefonave të mençur mobil.

iPhone 11 Pro dhe iPhone 11 Pro Max janë quajtur pajisjet më të reja dhe më të sofistikuara mobile të Apple.

iPhone 11 Pro dhe iPhone 11 Pro Max do të ketë një sistem prej tri kamerash, ndërsa do të ofrohen me ngjyra të ndryshme.

iPhone 11 Pro vjen me ekran prej 5.8 inçësh, kurse iPhone 11 Pro Max prej 6.5 inçësh, ndërsa dizajni i tyre është pothuajse identik me modelet e prezantuara vitin e kaluar, iPhone XS dhe iPhone XS Max.

Sipas shefit të Apple, Tim Cook, iPhone 11 Pro dhe iPhone 11 Pro Max janë krijuar për konsumatorët që duan “teknologjinë më të sofistikuar”.

Brenda iPhone 11 Pro dhe iPhone 11 Pro Max është procesori më i ri i Apple, A13 Bionic, dhe sigurisht se ky është “më i shpejti që ka ndonjë telefon i mençur”.

iPhone 11 Pro do të shitet me çmim fillestar prej 999 dollarësh, ndërsa iPhone 11 Pro Max me çmim fillestar prej 1199 dollarësh.

Telefonat do të dalin në shitje më 20 shtator, ndërsa porositë mund të bëhen nga 13 shtatori.