Thaçi fton shqiptarët në Mal të Zi për dalje masive në zgjedhjet e së dielës

Presidenti i Kosovës, Hashim Thaçi, ka ftuar shqiptarët në Mal të Zi, që gjatë kësaj të diele të dalin masivisht në zgjedhjet që do të mbahen në këtë vend.

Sipas të parit të vendit, zgjedhjet përbëjnë një momentum tejet të rëndësishëm, për vazhdimin e forcimit të orientimit euroatlantik të shtetit tonë mik.

“U bëj thirrje të gjithë bashkëkombësve tanë, që ta shfrytëzojnë të drejtën e tyre për të zgjedhur dhe forcuar stabilitetin politik, paqen dhe sigurinë në tërë Ballkanin Perëndimor”, ka shkruar Thaçi në Facebook.

Zgjedhjet në Mal të Zi mbahen më 30 gusht dhe partitë shqiptare janë bashkuar për të garuar së bashku.