Haradinaj: Lufta për demokraci fillon sonte

Kryetari i AAK’së Ramush Haradinaj ka reaguar pas zgjedhjes së Vjosa Osmanit presidente e Kosovës. Thotë se Osmani u bë e para e vendit me vota të kondrabanduara. Por thekson se partia e tij “qëndron faqebardhë në ruajtjen e sistemit kushtetues së demokracisë republikane”.

I pari i AAK’së thekson se nga sonte në vend duhet filluar lufta për demokraci.

“Lufta për demokraci fillon sonte. Ftoj politikanët dhe qytetarët e vullnetit të mirë të mbrojmë së bashku vlerat e Kushtetutës dhe shtetit të lindur nga gjaku i lirisë!”, shkroi Haradinaj.

Shkrimi i plotë i Haradinajt në Facebook:

Sot pas zgjedhjes së znj. Osmani-Sadriu për Presidente të Kosovës, Aleanca qëndron faqebardhë në ruajtjen e sistemit kushtetues së demokracisë republikane.

Votat e kontrabanduara në këtë proces tregojnë se Vetëvendosje dhe Guxo nuk guxojnë. Sistemi njëpartiak dhe i kapur sapo filloi. Aleanca do të jetë zë i ndërgjegjjes së popullit, shtyllë kushtetuese dhe mbrojtëse e ekonomisë së tregut të lirë.

Urime deputetëve që morën pjesë duke i përfshirë edhe ata të pazarit të natës që lan parimet për përfitime të atypëratyshme.

Lufta për demokraci fillon sonte. Ftoj politikanët dhe qytetarët e vullnetit të mirë të mbrojmë së bashku vlerat e Kushtetutës dhe shtetit të lindur nga gjaku i lirisë!

RH