Lajçak: “Shpresoj se nuk do të përballemi me një krizë tjetër brenda një jave – ose mund të harrojmë normalizimin”

I dërguari i Posaçëm i Bashkimit Evropian për bisedimet Kosovë – Serbi, Miroslav Lajçak ka thënë se heqja e barrikadave e ka zgjidhur problemin, por tensionet mbesin ende të larta.

Emisari evropian thekson se cikli i përsëritur i krizave të ndjekura nga zgjidhje të përkohshme i detyron negociatorët të angazhohen në “shuarjen e zjarreve, sepse nuk mund të përqëndroheni te normalizimi kur ka krizë.”

“Shpresoj se nuk do të përballemi me një krizë tjetër brenda një jave – ose mund të harrojmë normalizimin”, tha ai.

Lajçak këmbëngul se momentumi aktual është ideale për gjetjen e një zgjidhjeje dhe se nëse humbet ky momentum, marrëveshja mund të zvarritet për dekada. Nëse një marrëveshje nuk arrihet më së largu deri më 2024, Lajçak thotë se do të duhen të kthehen nga e para në këtë proces.

“Kjo është një mundësi reale, diku deri në dhjetor 2023 ose në fillim të 2024.  Nëse gjërat nuk bëhen deri atëherë, ne do të duhet të fillojmë nga e para. Nëse i kthehemi krizës dhe konflikteve, atëherë mund të harrojmë afatet”, theksoi Lajçak.

Megjithatë, sipas vlerësimit të mediumit, në këto rrethana, marrëveshja finale duket larg.

Lajçak gjithashtu ka kërkuar që të mos lejohet që situata të kthehet në një krizë tjetër.

“Ajo që është e rëndësishme tani, është që të mos lejohet rrëshqitja prapa në një tjetër krizë, dhe është e rëndësishme për liderët në Kosovë dhe Serbi që të nisin ta krijojnë një atmosferë të përshtatshme për diskutime produktive për normalizimin e marrëdhënieve”, ka thënë diplomati evropian, i cili po punon bashkë me SHBA-në dhe NATO-n në kuadër të përpjekjeve diplomatike mes mosmarrëveshjeve Kosovë-Serbi.

Ai ka thënë se përpjekjet nuk do të ndalen, duke thënë se muaji mars i vitit 2023 është afati i fundit për arritjen e një marrëveshjeje.