Presidentja e Kosovës, Vjosa Osmani bisedon me ambasadorin Philip Reeker, flasin për dialogun Kosovë-Serbi

Presidentja e Kosovës, Vjosa Osmani, ka zhvilluar një bisedë me ndihmës Sekretarin e Shtetit të Shteteve të Bashkuara të Amerikës për Çështje Evropiane dhe Euroaziatike, ambasadori Philip Reeker, i cili e uroi atë për pozitën e re, njofton Insajderi.

Siç bëhet e ditur në njoftimin për media të Presidencës, ambasadori Reeker theksoi se raportet e SHBA-ve me Kosovën janë të bazuara në vlerat demokratike dhe qëllimet e përbashkëta.

Në këtë bisedë është diskutuar edhe për dialogun Kosovë-Serbi, për çka Reeker tha se SHBA-të inkurajojnë palër që të angazhohen për arritjen e marrëveshjes ligjërisht të obligueshme, e cila do të përfundonte me njohje reciproke midis dy vendeve të Ballkanit Perëndimor.

“Më tej, ambasadori Reeker rikonfirmoi interesimin e Presidentit Biden për të mbështetur Kosovën drejt zhvillimit dhe zbatimit të reformave të nevojshme. Po ashtu, ambasadori Reeker potencoi angazhimin e SHBA-ve për të mbështetur shtetet e Ballkanit Perëndimor drejt anëtarësimit në Bashkimin Evropian”.

“Presidentja Osmani nënvizoi se partneriteti me SHBA-të është jetik për realizimin e prioriteteve të institucioneve të Kosovës në sigurimin e vaksinës kundër COVID-19 për qytetarët e Kosovës, si dhe zbatimin e reformave te brendshme që do të shtonin punësimin dhe do të luftonin në mënyrë efikase korrupsionin”.

“Ndërsa sa i përket dialogut me Serbinë, ambasadori Reeker theksoi se SHBA-të inkurajojnë palët që të angazhohen në mënyrë konstruktive drejt arritjes së marrëveshjes ligjërisht të obligueshme, e cila do të rezultonte në njohjen e ndërsjellë mes Kosovës dhe Serbisë”.

“Presidentja Osmani potencoi rëndësinë e përmirësimit cilësor të procesit të dialogut që bazohet në paprekshmërinë e territorit të Kosovës dhe karakterin unitar të shtetit e që i kontribuon paqes dhe prosperitetit në rajon. Presidentja Osmani theksoi se për Kosovën, ndriçimi i fatit të të pagjeturve mbetet prioritet të cilin institucionet synojnë ta shtyjnë përpara dhe për këtë kërkoi përkrahjen e SHBA-ve”, thuhet në komunikatë.