PSG thuhet se është e hapur ta shesë Neymarin

Duket se e ardhmja e Neymarit sa shkon e qartësohet, pasi Paris Saint-Germain thuhet se është pajtuar që ta shesë atë në këtë verë.

Ylli brazilian nuk është i lumtur në Francë, andaj në verë po e kërkon largimin nga Parku i Princave, gjersa lidhet me një rikthim në La Liga.

Sipas L’Equipe, PSG është i gatshëm ta shesë Neymarin në këtë verë, edhe pse e transferoi atë në vitin 2017 për një shifër rekorde (222 milionë euro).

Mediumi francez raporton se parisienët janë të lodhur nga kërkesa e braziliani që të largohet në këtë verë, andaj do t’ia mundësojnë largimin.

Por, largimi i tij nuk do të përfundojë aq lehtë, pasi PSG po kërkon 250 milionë euro nga shitja e 27-vjeçarit, derisa Real Madridi dhe Barcelona janë të interesuar për të.

Katalunasit mund të heqin dorë në momentet e fundit nga transferimi i Antoine Griezmannit për ta transferuar Neymarin, ndërsa madrilenët më shumë e preferojnë Kylian Mbappen.