Thaçi e Vuçiq takohen në Bratisllavë në ditën kur Haradinaj takohet me kancelaren Merkel

Presidenti i Kosovës, Hashim Thaçi dhe homologu i tij serb, Aleksandar Vuçiq, do të takohen të enjten, 6 qershor, në kryeqytetin e Sllovakisë, në Bratisllavë.

Qëllimi i këtij takimi do të jetë shqyrtimi realist i opsioneve aktuale për Samitin e Parisit.

Pas rezultatit zhgënjyes të Samitit të Berlinit, më 29 prill, palët u larguan edhe më shumë nga rruga e Marrëveshjes Finale, dy presidentët kanë vendosur që të diskutojnë paraprakisht dhe të angazhohen për parandalimin e dështimit eventual edhe të Samitit në Paris, që do të mbahet më 1 korrik, njofton Klan Kosova.

Takimi i Thaçit dhe Vuçiqit në kryeqytetin e shtetit që nuk e ka njohur Kosovën bëhet në të njëjtën ditë kur kryeministri Haradinaj do të takohet në Berlin me kancelaren gjermane Angela Merkel.

Nga kabineti i kancelares Merkel tashmë është konfirmuar takimi i Haradinajt me kancelaren gjermane, ku do të bisedohet për marrëdhëniet mes dy shteteve, por edhe procesi i marrëdhënieve mes Serbisë dhe Kosovës.