Ambasadori amerikan: Do të punojmë bashkë me BE-në për njohje reciproke Kosovë-Serbi

Ambasadori amerikan në Kosovë, Philip Kosnett, përmes një postimi në profilin e tij në Twitter thekson se do të punojnë me BE-në në mënyrë që të arrihet njohja reciproke mes Kosovës dhe Serbisë.

Këtë deklaratë Kosnett e ka dhënë pas takimit me Miroslav Lajçak.

“I kënaqur pas takimit me Lajçakun, me të cilin diskutuam interesat e përbashkëta në vazhdimësinë e dialogut. Marrëveshjet e Washingtonit plotësojnë procesin e drejtuar nga BE. Do të vazhdojmë të punojmë së bashku për të arritur qëllime të përbashketa, normalizimin dhe njohjen reciproke Kosovë-Serbi” , ka shkruar Kosnett në Twitter.